KALIBO, Aklan—Para kay Harold Miñano it Bugtaw Akean, klaru nga “diversionary tactic” eamang agud nga ilikaw sa isyu it pagbaril-patay sa 89 anyos nga peryodistang si Johnny Dayang ro ginahimo nga pagdaeahig sa andang pangaean it pilang mga katapo it media sa Aklan.
Sa interview it Bombo Radyo, nangawa sigon si Miñano kon ham-an nga pilit nga ginadaeahig it mga komentaristang sanday Noel Cabobos ag Carlo Asturias ro andang pangaean ni Rodulf Quitong sa brutal nga pagpatay kay Dayang.
Aminado imaw nga kat ginbaril si Dayang hay imaw mismo ro unang nag-chat sa group chat it aklan media angot sa natabu matapos nga nagtawag kana ro mga tawuhan ni Dayang sa anang baeay.
Apang bangud sa isyung pangseguridad hay owa imaw nagderetso sa baeay ag provincial hospital kun sa siin gindaea si Dayang bangud sa presensiya it gina-alegar nga pilang mga makadueudang indibidwal.
Ginpamalibaran man nana ro alegasyon nga ginpang-delete nana ro mga mensahe sa cellphone it pinatay nga journalist bangud nga ginkustodiya raya it kapulisan matapos nga marekober sa crime scene.
Sa kamatuoran suno kana nga pagka-aga matapos ro krimen hay ginpatawag sanda it kapulisan ag gin-imbestigahan pagpanguna ni PRO-6 Regional Director P/Brig. Gen. Jack Wanky matapos nga sanda hay ginkabig nga mga persons of interest.
Pagkatapos nga makatau it testimonya, mismong si Wanky sigon ro nag-offer nga taw-an sanda it police security bangud sa pagkabaeaka nga masundan pa ro pagpatay kay Dayang.
Nagpahayag man sanda it kahauman nga magtestigo agud nga mataw-an it hustisya ro pagkamatay ni Dayang.
Sa pihak nga parte, gindugang pa ni Miñano nga si Dayang hay tagasuporta ag amigo it mayoralty candidate nga si William Lachica.
Si Dayang man suno kana ro naka-isip it tagline nga Bugtaw Kalibo para sa partido ni Lachica.
Target sigon it partido nga obrahon nga Vice Mayor ni Lachica si Dayang, apang owa nagpasugot ro mga unga it peryodista rason nga andang gin-endorso si Jun Agravante.
samtang, sigurado sigon ro andang grupo nga politically motivated ro pagpatay kay Dayang.
Angot kara, panawagan nanda nga kundinahon it mga akeanon ro mastermind sa krimen.
