KALIBO, Aklan—Owa nakaangkon it anuman nga aberya ro pagdungka it sambilog eon man nga cruise ship sa isla it Boracay suno sa Philippine Coast Guard ukon PCG-Aklan.
Suno kay Senior Chief Petty Officer Dominador Salvino, deputy commander for operation it PCG-Aklan nga ro MV Norwegian Jewel it Norwegian Cruise Line hay nagdungka sa kaeawran nga sakop it Boracay bandang alas-8:30 it agahon antes nga nagderetso sa masunod kara nga destinasyon bandang alas-6:00 it gabi-i.
Raya hay may sakay nga kapin sa 1,600 nga pasahero.
Sangka matag-od nga programa ro ginpatigayon sa sueod it cruise ship kun sa siin nakaangkon it pagbaeayluhan it plake.
Ro mga turista hay gintaw-an it kahigayunan nga makalibot sa nagkaeain-eain nga tourist spot sa isla sa gintaeana kanda nga oras.
Sa pagpanaog nanda sa barko, ro mga bisita hay ginsug-aeaw it cultural performance ag gintaw-an it mga souvenir items.
Nauna eon nga ginkumpirma it provincial government it Aklan nga ro nasambit nga cruise ship hay uman nga magabalik sa Boracay sa Nobyembre 29 ag Disyembre 1.
Ginaeuman nga lima nga international cruise ships halin sa Europe ag America nga magadaea it kapin sa 10,000 nga mga pasahero ro maga-abot sa isla makaron nga Nobyembre hasta Disyembre.
