KALIBO, Aklan–Nakansela ro nakataeana kunta nga pagdungka it sangka cruise ship nga Westerdarm kainang agahon sa isla it Boracay bangud sa mabaskog nga hangin ag humbak tuga it epekto it Amihan.
Suno kay Nieven Maquirang, Executive Assistance V it Office of the Provincial Governor nga pasado alas-7:00 it agahon kaina kat nag-abot sa kaeawran it Boracay ro cruise ship apang owa raya nadayun sa pagdungka bangud naapektuhan ro anchorage area.
Ginpakamayad eon lang sigon it kapitan it cruise vessel nga kanselahon ro andang pagbisita sa isla tuga it maeain nga panyempo.
Kaibahan kunta sa paga-agyan it Westerdam ro Boracay matapos nanda nga maghapit sa Singapore ag Puerto Princesa, Palawan.
Bangud sa bad weather condition hay nagdiretso eon lang sanda sa bahin it Metro Manila.
Ro nasambit nga cruise ship hay may sakay nga 1,993 nga pasahero ag 790 nga mga crew.
Nagaeaum si Maquirang nga magnami ro tyempo sa maabot nga Marso 6 ag 8 bangud sa ginaeauman nga pag-abot it daywa pang cruise ship sa isla.
Nasayuran nga ginatun-an eon it Provincial Government nga makaangkon it cruise port sa Boracay agud nga maging sangka cruise hub raya sa paeaabuton.
Sa pihak nga parte, ginkumpirma man it Coast Guard Station (CGS)-Aklan ro kanselasyon it pagdungka it Westerndam cruise ship.
Suno kay CG PO2 Paolo Jauod it CGS-Aklan nga ginkamayad eon lang nanda ag maskin it kapitan it cruise ship nga kanselahon ro pagdungka nanda sa Boracay para sa kaeuwasan it mga pasahero.
