KALIBO, Aklan — Mabahoe ro pagpasaeamat it pamilya Perlas sa gin himong pagkilaea it Sangguniang Panlalawigan (SP) Aklan sa baganihang “Doctor to the Barrio” nga si Dr. Dreyfuss Perlas, residente it Batan, Aklan.
Madumduman nga ro 31-anyos nga doktor hay binaril-patay sa Kapatagan, Lanao del Norte ku Marso 1 samtang sakay it anang motorsiklo pauli maghalin sa sangka medical mission.
Ro gintaong posthumous commendation it SP hay bilang pagkilaea sa gin pakitang pagiging baganihan ag indi matumbasan nga pagserbisyo ni Perlas bilang volunteer doctor sa Sapad, Lanao del Norte.
Gin baton it anang ginikanan nga sanday Batan SB member Dennis Perlas ag Leovigilda Perlas, sangka manugturo ro nasambitan nga pagkilaea.
Hasta sa makaron hay padayun nga naga pangayu it hustisya ro anang pamilya sa pagkamatay kara.
Nauna kara, gintaw-an it posthumous award nga Hero on National Health it Department of Health si Dr. Perlas.
