KALIBO, Aklan—Ro pagka-kalbo it kagueangan, climate change, problema sa drainage system ag iba pa ro pila eamang sa mga rason it nagakatabu nga maeapnagon nga pagbaha.
Raya ro ginpahayag ni Dr. Rebecca Tandog-Barrios, executive director it Philippine Initiative for Conservation of Environment and the People ukon Philincon.
Suno kana nga makaron nga tiempo hay indi eon dapat nga makibot ag mangawa nga nagatuhaw ro grabeng pagbaha maskin nga owa it anunsyo nga may bagyo.
Kapareho it natabu ko nagtaliwan nga domingo eabi eon sa probinsiya it Aklan kun sa siin maskin nga owa pa tumama ro bagyong Paeng sa kaeugtaan ag ro naexperiensiyahan pa eamang hay shearline ag trough it bagyo hay nakaexperiensiya it grabeng pagbaha.
Bangud sa ginapangatubang nga krisis sa klima, ginsuhestiyon nana sa lokal nga gobyerno ag sa publiko nga kinahangean nga maging preparado ag matatag ro tanan sa pag atubang it anuman nga kalamidad.
Dapat nga may nakaplastar eon nga disaster risk response, relocation ag evacuation agud nga mapahagan-hagan ro kahalitan ag malikawan ro casualties.
Ginpahayag dugang nga indi dapat sigon nga masakripisyo ro mga gina-iligan it tubi ukon water ways kapareho it suba, sapa, wetland ag mangrove area agud nga taw-an it daean ro mga infrastructure projects.
Ro tawo suno kana ro mismong nagasamad sa palibot nga imaw ro nagaprotekta sa komunidad.
