KALIBO, Aklan — Mayad nga balita ro hatud para sa mga lolo ag lola matapos nga aprubahan it Kongreso ro pagpaeapad sa universal social pension para sa tanan nga senior citizens sa Pilipinas.
Suno kay Kalibo Sangguniang Bayan member Augusto Tolentino nga raya hay nagakahueugan nga maskin nga bukon it indigent hay makabaton it kada buean nga pensyon.
Ro mga benepisyaryong pigado nga senior citizens hay padayun nga makabaton it P1,000 kada buean; samtang P500 kada buean man ro igatau sa iba pang miyembro it senior citizen.
Ginpaathag pa ni Tolentino nga sa idaeum it universal pension, ro tanan nga senior citizens sa nasyon, manggaranon man ukon pobre hay makabaton eon it pensyon .
Nakabaehag pa nga sa sueod it limang dag-on nga pagpatuman it laye, tanan eon nga senior citizens hay makabaton it universal social pension nga P1,000, maskin nga nagabaton it iba pang pension benefits halin sa iba pang pension providers.
Mag-eowas kara, may iba pang gin-aprubahan nga benepisyo para sa mga katigueangan nga pwedeng magamit para sa andang kamaeayran ag ikamayad nga eawas .
Laygay pa ni Tolentino nga maghueat it dugang nga anunsyo halin sa office of the senior citizens association sa Aklan ag natungdan nga banwa.
Gin engganyo man nana ro mga naga-edad it 60 anyos pataas nga mag apply eon sa andang senior citizens office agud nga masakop it bag-ong laye.
