KALIBO, Aklan—Nagapati ro Municipal Agriculture Office it Numancia nga indikasyon it malimpyo nga tubi ag maabu nga pagkaon sa lugar ro sightings it dolphins ko nagtaliwan nga adlaw it Sabado sa baybayon nga sakop it Barangay Camanci Norte ag Navitas sa banwa it Numancia.
Suno kay John Alcazarin, fisheries technician it nasambit nga opisina nga naispatan nanda ro grupo it mga dolphins sa ginpatigayon nga scheduled monitoring ag validation it municipal cultural heritage team ag katapo it bantay dagat may 300 hasta 500 kilometro ro kaeayuon halin shoreline.
Kada dag-on suno kana hay nagapatigayon sanda it mapping ag assessment sa lugar agud nga matumod kon anong klase it dolphins ro nagadayo nga posibleng nagapahuway halin sa migration ag nagakaon.
Posible man suno kana nga may mga nagadayo man nga whales apang owa eang nanda natiempuhan.
Pilang beses eon man sigon nga may sightings it dolphin idtu apang raya ro unang beses nga medyu maabu ro andang numero.
Gindugang pa ni Alcazarin nga may mga proyekto sigon sanda sa lugar kapareho it artificial reef nga hugut man nga ginabantayan it mga mangingisda rason nga ginadayo it nasambit nga klase it mga mammals.
Nasayuran nga maabu nga mga netizens ro nakibot sa ginpost nga video it municipal agriculture office sa naispatan nga grupo it mga dolphins nga naga-eumpat-eumpat sa dagat nga medyu nagahampang.
Samtang, nagaeaum si Alcazarin nga maprotektahan ro mga marine species eabi eon ro mga ginakabig nga endangeres species kapareho it pawikan agud nga mas pa sanda nga mag-abu sa nasambit nga lugar.
Padayun man ro andang panawagan nga indi pag halitan ro mga marine mammals kapareho it dolphin kamana man nga indi magpilak it basura sa dagat bangud sa peligro nga daea kara sa mga marine species.
