KALIBO, Aklan—Ro pagtukod it casino sa Boracay hay indi makabulig sa paglimpyo kara sa baylo hay mas pang makapahigku.
Raya ro pagpati ni Fr. Jude Rebaldo, kora paroko it St. Joseph Spouse of the Blessed Virgin Mary Church sa banwa it Banga.
Suno kana ro pagtukod it casino sa isla hay magaresulta raya it mas mabahoe pang problema kapareho it prostitusyon, illegal nga droga, panakawan, krimen ag iba pa.
Mag-eowas kara, mas pa sigon raya nga magatuga it kapigaduhon bangud sa pagpati nga ro sugae hay makatau it instant nga kwarta.
Gindugang pa kara nga indi kinahangean it casino agud nga mas pang ma-promote ro isla.
Maka-apekto sigon ro ideya sa kultura ag moralidad it mga taga Boracay ag taga Aklan.
Sa pihak kara, ginpahayag ni Fr. Rebaldo nga ginaeauman eon nanda nga raya nga matabu bangud sa ginaduso nga Boracay Island Development Authority ukon BIDA GOCC nga makaron hay una eon sa ikaywang pagbasa sa manaba nga kapueongan it kongreso.
Engkaso nga maaprubahan, owa sigon it sin-o man nga makapugong sa kon anuman ro andang plano sa isla.
Dapat suno kana nga maghugpong ag magpanindugan ro aklanon sa pagkontra sa pagpatindog it casino sa Boracay.
