KALIBO, Aklan–Posibleng sa 2023 hay maitukod eon ro Land Transportation Office ukon LTO District Office sa banwa it Ibajay.
Raya ro ginpahayag ni Engr. Marlon Velez, hepe it LTO-Aklan matapos nga maging laye ro hagna nga ginduso ni 2nd District Congressman Ted Haresco.
Si President Rodrigo Duterte ro nagpirma sa Republic Act 11748 ukon pagtukod it “Western Aklan LTO Center” sa Barangay Colong-Colong sa banwa it Ibajay kun sa siin tuyo kara nga mapaeapit ro serbisyo sa publiko.
Suno kay Engr. Velez nga ro bag-ong LTO District Office hay makapahagan-hagan sa numero it mga nakikipag-transaksyon sa andang Kalibo Office.
Engkaso nga magbukas ro nasambit nga District Office , indi pa nanda masiguro kon magapadayun ro operasyon it andang extension office sa banwa it Malay.
Apang sa makaron hay padayun ro pagbaton kara it mga transaksyon sa mga nagabo-oe it lisensiya ag nagaparehistro it mga saeakyan.
Nakadepende man sigon raya sa pagdesisyon it andang regional office eabi eon kon mataeupangdan ro pagdagsa gihapon it mga kliyente kun sa siin pila sa mga raya hay nagahalin sa probinsiya it Antique.
