Ginpamalibaran it Malakanyang nga uwa nasolusyunan ro kinahangeanong medikal ni dating Pangueong Rodrigo Duterte samtang nakakulong raya sa International Criminal Court.
Ro reaksyon it Palasyo hay kasunod it naging pahayag ni Senator Bong Go nga nagahambae nga madja uwa natatao ro mga bueong it dating pangueo bangud nakita nana sa ginhiwat nga first appearance kara sa pre trial chamber it ICC nga nagapangeuya ro dating pangueo.
Suno kay Palace Press Officer USec Claire Castro nga opinyon eamang raya ni Senator Go, uwa eani sigon ro senador sa mismong lugar kun siin makaron si dating Pangueong Duterte.
Ginpamilit ni Castro nga mismong mga doktor eon it ICC ro nagapamatuod nga mentally aware ag mentally fit ro dating Pangueo samtang may una man sigon rayang nakataeana nga doktor nga nagabantay sa ikamayad nga eawas kara.
Apela eon lamang ni Castro, dapat magmasid ag maging maaeam sa mga makarayang klaseng panghambaeon para indi makagulo sa isipan ag baeatyagon it kada isaea.
