KALIBO, Aklan–Nakataeana nga makipagkita makaron nga adlaw sa mga overseas Filipino workers ukon OFW’s si Pangueong Ferdinand Marcos Jr. nga presenteng idto sa Davos, Switzerland bilang kaparte it anang aktibidad sa pagtambong sa World Economic Forum.
Suno kay Bombo International Correspondent Josephine De Jesus it Zurich, Switzerland nga sa oras nga mataw-an imaw it kahigayunan nga personal nga makaistorya ro presidente hay ana nga igapaabot ro problema it mga pumueoyo sa Pilipinas angot sa mataas nga panueoktan sa electric bill ag ro sigidas nga pagtinaas man it presyo it mga prime comodities.
Nataeopangdan sigon nana ro nasambit nga mga hinaing aton nga mga kababayan kat nagbakasyon imaw sa Batangas ko nagtaliwan nga Disyembre.
Nagakabaeaka sigon sanda nga mga OFW’s sa sitwasyon it andang pamilya iya sa Pilipinas bangud nga ginabalanse man nanda ro ginapadaea nga remittances nga may anda man nga mahawiran idto sa ibang nasyon.
Nauna eon nga ginpahayag it delegasyon it administrasyon nga puspusan ro pagtrabaho ni Pangueong Marcos sa World Economic Forum para makaengganyo it mas maabong investors sa nasyon.
Uwa ginauyangan it Pangueo ro anang oras ag tanan nga oportunidad hay ana nga gina take advantage.
