KALIBO, Aklan–Nakataeana nga pagadaehon sa Provincial Capitol it Negros Oriental ro patay nga eawas ni Governor Roel Degamo umpisa makaron nga adlaw it Miyerkules, Marso 8 hasta Marso 13.
Ginpahayag ni Bombo News Correspondent Elna Mariño nga pagabuksan raya sa publiko antes imaw igadiretso sa anang mga igbata sa banwa it Siaton.
Ginaeauman man ro pagbisita ni Pangueong Ferdinand Marcos Jr. sa haya it nagtaliwan nga gobernador makaron nga adlaw.
Suno kay Mariño, nagapabilin gihapon ro kahadlok sa mga pumueoyo it bilog nga probinsya matapos ro natabo nga assassination kay Degamo ko adlaw it Sabado sa mismong baeay kara sa Sitio Nueve, Brgy. San Isidro, Pamplona.
Madumduman nga owa it kaeooy nga ginbaril-patay it an-om ka mga suspek ro opisyal kaibahan ro waeo pang mga sibilyan ag may iba pang naninahan.
Maskin ro mga karsada suno kana hay masyadong mahawan kung igakumpara pilang adlaw antes natabo ro insidente.
