Suportado it Philippine Chamber of Commerce and Industry ukon PCCI-Aklan ro ginpaguwa nga mandu ni Kalibo Mayor Juris Sucro nga nagabawas sa operational hours it mga resto bar and restaurants sa banwa kasunod it nagatinaas nga mga krimen ag aksidente sa daeanon nga kaeabanan nga nagakatabu sa dis-oras it gabi-i ag ginakaeakutan it mga menor de edad.
Mag-eowas kara, nataeupangdan man ro uman nga pagtaas it kaso it COVID 19 sa banwa.
Base sa Executive Order No. 026 ni Mayor Sucro, ginalimitahan kara ro oras it operasyon it nasambit nga mga establisimento it hasta ala-1 it aga-aga kamana man nga bawae eon sanda nga magserbi it mga makahieilong nga ilimnon umpisa alas-11:30 it agahon.
Nakabaehag pa sa mandu nga magapatuman it curfew hours sa mga minors umpisa alas-10 it gabi-i hasta alas-4 it aga-aga.
May nagakaigo nga penalidad ro sin-o man nga madakpan nga naga-eabag sa nasambit nga mandu.
Suno kay PCCI-Aklan chairman of the board ramel buncalan nga kaeabanan sa andang mga kaibahan nga negosyante hay nagasuporta sa anuman nga tikang it gobyerno para sa kamaeayran it tanan.
Bukon sigon it apektado kara ro mga restaurants nga 24 oras ro operasyon nga owa nagabaligya it aeak.
May naga-eksister eon man sigon nga ordinansa nga bawae nga baligyaan it aeak ro mga menor de edad.
Sa makaron hay ginatinguhaan it LGU-Kalibo nga magapabilin nga manaba ro COVID cases agud nga madayun ro ginaduso makaron nga pagpatigayon it face-to-face nga ati-atihan festival 2023.
