Nag-umpisa eon nga magpanaeasa sa pilang mga kamaisan sa probinsiya it aklan ro pesteng ginatawag nga fall army-worm.
Suno kay aklan provincial agriculturists Salome David nga dati eamang raya nga makita sa kontinente it Amerika apang ko ulihi hay nagkalhit sa Africa ag Asya.
Makabig sigon raya nga devastating pests bangud nga masarangan kara nga kaunon ro kapin sa 353 nga klase it tanum .
Ginpaathag pa ni David nga naga-atake ro nasambit nga peste sa mga pananum nga mais ag unang-una kara nga ginakaon ro pinaka-tunga ag mga naga-ugbos nga batang dahon.
Apang kon may bunga eon ro mais hay ginakaon man it mga raya ro bunga it mais.
Nataeupangdan sigon it mga mangunguma sa aklan ro peste pagkatapos nga magpanaeasa ro bagyong Ursula ko disyembre 25, 2019 apang ko 3rd quarter it 2019 hay nagpaandam eon kara ro department of agriculture sa mga municipal agriculturiests nga nagpanaeasa sa ibang parte it nasyon .
Ginpahayag pa it opisyal nga naka-abot ro nasambit nga mga peste sa mga kamaisan it aklan bangud nga migratory ro mga raya ag may ikasarang nga mag-eupad ro mga raya sa mga maeayo nga lugar daea it hangin.
Masarangan sigon kara nga samaron ro mga puting mais ag mga open-polynated crops.
Ro peste hay nataeupangdan eon sigon sa mga kamaisan it banga, malinao, madalag ag numancia.
Gindugang pa ni david nga bangud nga tempranong na-detect ro mga fall army worm sa probinsiya, pwede pa raya nga gamitan it mga insecticide .
Pwede man sigon ro pagsabud it kaeamay ukon asukar sa pananum agud nga magdapo ro mga tagasaw nga imaw ro magasugod sa mga ueod.
Nagpanawagan man si david sa mga mangunguma nga insigidang makipag-angot sa andang taeatapan ukon municipal agriculturists engkaso nga may makitang bag-ong peste sa andang pananum para sa assistance .
Indi pa sigon nanda matumod ro kahalitan it peste bangud nga bag-o pa eamang raya nga naga-atake .
Sa makaron sigon hay padayun ro imbestigasyon it regional crop protection center ag bureau of plant quarantine sa mga pananum sa probinsiya .
