KALIBO, Aklan–Naga-abot sa haeos 300 ka mga senior citizen ro nagtambong sa ginpatigayun nga focus group discussion it Philippine Army sa covered court it Kalibo Pastrana Park.
Suno kay CpL Regie Eson it Philippine Army nga owa nanda ginaeauman ro pagbuhos it maabu nga mga senior citizen sa andang gin-organisa nga hinun-anon.
Agud nga maidid nga matalakay ro problema it mga katigueangan partikular sa social pension, nag-imbita sigon sanda it focal person halin sa Department of Social Welfare and Development (DSWD)-6 ag iba pang natungdan nga ahensya it gobyerno.
Nasayuran nga nagapatigayun it Public Information Patrol ro Philippine Army kung siin kaeabanan sa andang nakaka-istorya nga nabilin sa baeay hay mga senior citizen.
Ro focus group discussion sigon ro andang sambilog nga naisipan nga pamaagi para mataw-an it nagakaigo nga igtueopangod ro isyu it mga senior citizen.
