Nag-apela makaron ro Aklan Provincial Health Office ukon PHO Aklan sa mga eligible public individual nga magpabakuna eon it andang booster shot it covid-19 vaccine.
Raya hay matapos nga manaba gihapon ro porsyento it mga nabakunahan it booster shot sa target percentage kon siin tuyo kara nga maeab-ot ro 50 porsyento it populasyon kadungan sa nagahilapit nga ika-100 diyas sa pwesto ni Pangueong Ferdinand Marcos Jr.
Madumduman nga nagpahayag ro presidente nga gusto nana nga maabot ro herd immunity sa bilog nga nasyon pinaagi sa pagturok it booster shot it bakuna kontra sa pandemya.
Suno kay J-Lorenz Dionisio, provincial vaccination manager it PHO Aklan nga nakaabot it 101.24% sa target population ro naturukan it atleast one dose it bakuna samtang ro fully vaccinated ukon ro nabakunahan it daywang doses it covid-19 vaccine hay naabot ro target percentage nga 96.38%.
Apang, pag-abot suno kana sa booster shot hay 18.67% pa eamang ukon 80,000 individual halin sa 415,000 target population.
Bangud kara, ginapaeapit eon nanda sa tawo ro pagbakuna partikular sa mga merkado publiko, eskwelahan ag opisina.
Nauna eon nga ginpaathag it mga health expert nga mabahoe nga bulig sa tawo nga makasukoe sa virus kon naturukan it bakuna hasta it booster dose.
