KALIBO, Aklan–Uman nga magapatigayon ro department of health it nationwide supplemental vaccination program kontra sa polio, tipdas ag rubella sa maabot nga buean it Mayo 2023.
Suno kay J-Lorenz Dionisio, Nurse III it Provincial Health Office ukon PHO-Aklan nga target kara nga mabakunahan ro 95% it mga inunga nga naga-edad it limang dag-on panaba.
Pagataw-an ro mga raya it booster dose it measles, rubella ag oral polio vaccine.
Angot kara, umpisa Huwebes hasta it Biyernes hay magapatigayon it Provincial Command Conference sa Aklan Training Center ro mga tawuhan it PHO-Aklan kaibahan ro nagkaeain-eain nga municipal heath office sa bilog nga probinsiya, mga ospital ag iba pang natungdan nga ahensiya it gobyerno bilang preparasyon sa nasambit nga kampanya.
Ginpahayag ni Dionisio nga tuyo kara nga matapna ro nasambit nga mga deadly viruses ukon posibleng pagtuhaw it outbreak it tipdas kamana man ro uman nga pagbalik it mga kaso it polio nga sangka sakit nga may potensiyal nga makapahina sa eawas ukon magaresulta sa pagka-paralyze.
Aminado man ro PHO-Aklan nga naka-apekto it mabahoe ro COVID-19 pandemic sa vaccination coverage sa aklan nga nag abot eamang sa 55% sa mga eapsag halin sa mga health centers ukon owa nakapabakuna ukon owa nakakompleto it required nga bakuna.
Sa makaron hay may mga na-detect eon nga kaso it tipdas sa ibang mga probinsiya sa western visayas partikular sa Iloilo ag Negros nga masyadong makataeapon.
Kadungan kara, gina engganyo ro mga ginikanan ukon guardian nga pabakunahan ro andang mga unga
