KALIBO, Aklan— Mag-eowas sa 68 nga numero it mga compliant hotels and resorts nga may 3, 519 total numbers of rooms nga ginpaguwa it Department of Tourism (DOT) nga makapag-operate sa soft opening it Isla it Boracay, 25 bar ag restaurants kamana man 52 nga mga souvenir shops, spa, ag diving centers eon ro nataw-an it certificate of compliance it Department of Environment and Natural Resources (DENR).
Nauna eon kara nga naging mala-fiesta ro ginpatigayon nga dry run kon siin mga Aklanon eamang ro ginpasugtan nga makasueod sa Isla ag uwa eon ginsukta it terminal ag environmental fee.
May kaangtanan kara, nagtaeana it registration counter ro jettyport management para ma-monitor kon nag-abot eon sa allowed maximum capacity ro sangka hotel.
Samtang, ro mga turistang may bookings hay kinahang-ean nga i-presenta ro andang booking vouchers sa registration counters sa paeoparan ag pantalan antes pagapasudlon sa Boracay sa uman kara nga pagbukas sa Oktubre 26.
Sa pihak nga parte, mag-eowas sa mga empleyadong obligado nga magbueo it terminal ID pass, gin-eaygayan man ro mga residente nga magpa-register para mataw-an it access pass nga pwedeng gamiton sa pagguwa-sueod sa Isla.
