KALIBO, Aklan—Ginpaathag it Bureau of Fisheries and Aquatic Resources (BFAR) nga epektibo eon ro pagpatuman it closed fishing season it lokal nga gobyerno it New Washington ag Batan angot sa pagdakop it pilang klase it isda sa kaeawran nga andang nasakupan.
Suno kay Mr. Armel Cipriano it Fisheries, Protection and Law Enforcement Group it BFAR-Aklan nga nag-umpisa ro close season sa pagdakop ukon pagbaligya it mga isda kapareho it tamban, herring ag mackerel ukon hasa-hasa umpisa ko Nobyembre 15 hasta Marso 15, 2022.
Kada dag-on hay nagapatuman sigon sanda it closed fishing season para sa nasambit nga mga isda sandig sa Municipal Ordinance partikular sa Fishery Code of 2020.
Tuyo kara nga maprotektahan ag mataw-an it tyempo ro mga isda nga makapangitlog ag magpaabo it andang species.
Ro sin-o man nga madakpan nga mag-eabag sa nasambit nga mandato hay posibleng magpangatubang sa penalidad, pagkumpiska it fishing paraphernalia ag pag-revoke it lisensya.
Nasayuran nga gindeklara eon man it BFAR ro tatlong buean nga closed fishing season sa Visayan Sea umpisa Nobyembre 15 hasta Pebrero 15, 2022.
