KALIBO, Aklan—Pilang mga banwa sa western side it probinsiya it Aklan ro naka-experiensiya it pagbaha bandang alas-11:00 kabi-i bangud sa mabaskog nga uean daea it shearline.
Sa parte it banwa it Nabas, maabu ro nag-evacuate nga mga residente sa andang mga kaeapit nga may mga daywang gradong baeay.
Suno kay Local Disaster Risk Reduction and Management Officer II Reynard Madrazo Dela Cruz, head it MDRRMO-Nabas nga kapin sa 34 nga indibidwal halin sa barangay Alimbo Baybay ro nagbakwit bangud sa gulping pagtaas it baha.
May sangka baeay man ro partially damaged bangud sa insidente.
Pilang suba ag creek suno kana ro nag-apaw nga naka-apekto sa mga catch basin ukon mga manaba nga barangay.
Sa pihak nga parte, nagtuga man it paghinay it daeagan it trapiko sa national highway ro maisot nga landslide nga natabu sa barangay Habana ag Libertad nga sumakop sa haeos katunga it karsada.
Ginpahayag ni Dela Cruz nga insigida man nga nagpatigayon it clearing operation sa lugar ro LGU-Nabas ag naibalik eon sa normal ro daeagan it trapiko.
Bandang alas-4:00 kaina it aga-aga hay amat-amat eon nga naghubas ro tubi-baha, kun sa siin nagtuga it kasamaran sa pilang mga karsadahon.
Ginatantiya nga kaeabanan sa 100 nga households nga apektado it pagbaha sa maabu nga mga barangay, pila sa mga raya hay naka-uli eon sa andang natungdan nga baeay.
Nagpahaum man ro LGU-Nabas it food packs nga ginpanupod sa mga apektadong residente.
Mag-eowas sa banwa it Nabas hay nakaexperiensiya man it mga pagbaha ro banwa it Malay, Ibajay ag pilang portion it Tangalan.
