KALIBO, Aklan–Pabor ro pilang ka mga negosyante sa gindihon nga House Bill 7032 ukon West Aklan Special Economic Zone Authority (WASEZA) ni Aklan 2nd District Congressman Teodorico Haresco Jr. sa House of Representatives.
Sa ginpatawag nga press conference ni Haresco, ginpahayag ni Mr. Cedric Sazon, sangka kilaeang negosyante sa probinsya it Aklan nga pabor imaw sa proposisyon it kongresista bangud maabu raya nga magiging bentaha.
Partikular nga gintumod ni Sazon nga makabulig raya sa pagtaas it tax collection ag turismo.
Apisar nga maabu pang kinahang-ean ayuson sa kaundan it WASEZA Act, nakikita man kara nga maabu ro bentaha nga siguradong makabulig sa mga pumueoyo.
Ginpunto ni Sazon ro pagkriar it maabu nga oportunidad ag trabaho bangud maga-engganyo raya it mga negosyante ag iba pang kapitalista.
Nasayuran nga sakop it ginaduso nga WASEZA ro pilang porsyon it banwa it Tangalan, Ibajay ag Malay.
Raya man ro magadumaea sa mga gintumod nga Special Economic Zone kung siin pagataw-an sanda it 50 anyos nga corporate franchise sa oras nga maging epektibo ro laye kamana man nga iga-organisa sa sueod it 150 diyas engkaso nga eubusang maaprubahan.
