KALIBO, Aklan—Inde eon masayran it pilang mga overseas Filipino workers sa nasyon it Lebanon ro andang obrahon bangud sa koeba, kahadlok ag kawad-an it tueog daea it mga pagpambomba it Israeli Defense Forces bilang baeos sa Hezbollah kasunod it pag-atake it Iran sa nasyon it Israel.
Bangud kara, desidido eon si Emie Segayo, Bombo International Correspondent sa Beirut, Lebanon nga mag-uli sa Pilipinas maskin nga palangga pa nana ro anang trabaho sa nasambit nga nasyon.
Sa kamatuoran suno kana hay nakataeana ro anang byahe pauli sa Pilipinas sa October 19 sa pinaagi it commercial flight.
Ginpaathag ni Segayo nga bukon eon it eowas ro mga pumueoyo Beirut bangud sigidas ro pag-atake it Israel nga ginkamatay eon it pilang ka mga indibidwal.
Maskin siin sigon mag-adto hay mabatian ro mga mabaskog nga eopok nga naga tao kanda it kahadlok ag trauma.
Maskin nga uwa imaw it problema sa ana nga employer ag ginaprotektahan man imaw hay inde eon sigon raya magpahawid bangud nga kinahang-ean nana nga makauli it buhi sa anang pamilya nga nagahueat iya sa Pilipinas.
Si Segayo hay tubong Zambaonga Del Norte sa Mindanao ag kapin sa 15 anyos eon nga nagatrabaho sa Lebanon bilang domestic helper.
Samtang sa pihak nga parte, nakaangkon it internasyonal nga batikos ro Israel matapos ro pag-atake sa mga peacekeepers it United Nation nga idto sa rehiyon.
Suno sa United Nations Interim Force in Lebanon (Unifil), sangka tangke it Israel ro ginpaeopok sa andang taeatapan sa banwa it Naqoura sa nabagatnan nga Lebanon nga tumama sa sangka observation tower ag naninahan ro daywang peacekeepers.
