ALTAVAS, Aklan -Ginka-alarma it sangka pamilya ro andang naeksperyensiyahan ko nagtaliwan nga adlaw it martes bandang alas-10:00 it gabi-i nga gina-alegar nga pilit nga ginabuksan ro andang bintana it sangka owa nakilaea nga indibiwal sa Barangay Poblacion, Altavas.
Suno kay Rob Algarne, residente it nasambit nga lugar nga samtang nagakatueog ro anang ama sa andang sala hay nabatyagan nana nga may pilit nga nagabukas it andang sliding window.
Apang, ginbalewala nana raya sa pagpati nga ro anang umagad ro may kahimuan.
PAgka-aga suno kana hay gin-usisa it anang ama kon anong oras nag-uli ro anang mister.
Pagkatapos nga hambaeon nga insigida man raya nga nag-uli matapos nga ihatud ro anang bilas hay dikara eon nagduda ro andang ama nga may pilang tawo nga naghana nga magsueod sa andang baeay.
Ro bintana sigon nga pilit nga ginbuksan hay maeapit sa andang main door.
Sa pag-usisa it andang igkampod nga pulis, may nakita nga mga finger prints sa bintana ag foot prints hasta sa ibabaw it andang under construction nga baeay.
Bangud nga owa man it natakaw nga gamit sa sueod it baeay, gin-refer it Altavas Municipal Police Station ro kaso sa andang barangay council.
Madumduman nga ro nasambit nga naeksperyensiyahan it pamilya hay gin-post nanda sa social media agud nga makatau it awareness sa publiko nga insigida man nga nag-viral.
Ro insidente hay kasunod it mga napabalita nga may nagawinarang nga mga indibidwal kaibahan ro pilang menor de edad nga nagapanuktok sa mga kabaeayan ag nagapangayo it tubi.
Ginklaru ni P/Capt. Ryan Batadlan , acting chief of police it Altavas Municipal Police Station nga owa pa sanda it may nabaton nga report angot kara.
Aminado imaw nga nakita ag nabasahan eon sigon nana ro makarondaya nga balita sa social media nga gin-post it netizen maghalin sa Barangay Poblacion ag Cabugao.
Ro insidente hay ginpa-imbestigahan eon nana sa anang kapulisan ag padayun ro pagtipon it mga ebidensiya kabulig ro barangay council agud nga masayuran kon lehitimo ro balita.
Apela nana sa mga residente nga insigida nga mag-agto sa mga awtoridad kaysa sa social media bangud nga ro kapareho nga mga alegasyon hay nagatuga it alarma ag panic.
