KALIBO, Aklan—Gindayaw ni Aklan 1st district congressman Carlito Marquez ro naging kaundan it unang State of the Nation Address ni Pangueong Ferdinand ‘Bongbong” Marcos, Jr.
Suno kana nga naging maayos ro pagplastar it pangueo sa anang commitment partikular sa sektor it agrikultura ag imprastraktura ag igapaeapit ro health services sa mga tawo.
Mabahoe sigon raya nga bulig agud nga mataw-an it katumanan ro pagtukod it geriatric center eabi pa ag eubusan eon raya nga naging laye nga nagatuyo nga matatap ro mga pigado nga mga senior citizens ag mga may kapansanan.
May determinasyon sigon si Pangueong Marcos nga ipa-prayoridad ro pagtau it mayad nga serbisyo sa publiko.
Samtang, nagaeaum man si congressman Marquez nga maaprubahan eon ro anang iga-refile nga proposed bill nga pagtukod it siyudad sa mga probinsiya nga owa pa it siyudad kapareho it Kalibo.
Kamana man ro anang waste to energy bill para sa dugang nga renewable energy sa nasyon.
Mabahoe suno kana raya nga bulig sa problema sa basura nga ginapangatubang sa Metro Manila ag isla it Boracay.
