KALIBO, Aklan — May person of interest eon ro kapulisan angot sa natabu nga panakawan sa Sitio Sagasa, Barangay Poblacion, Lezo, gabi-i it Huwebes, Enero 2, 2025.
Suno kay P/Capt. Gilbert Batiles, hepe it Lezo Municipal Police Station nga gina-usoy eon nanda ro suspek nga sangka menor de edad ag may dati eon nga record it pagpanakaw.
Nagatuhaw sigon sa andang imbestigasyon nga sangka baeay eamang ro gintakawan kara kabaliskaran sa napabalita nga 10 ag nagpanueod-sueod eamang sa iba pang mga kabaeayan agud nga makalikaw sa mga barangay tanod ag pulis nga nakabantay sa karsada.
Sa makaron hay daywang indibidwal ro andang gin-imbitahan angot sa insidente.
Nauna eon nga ginpahayag sa Bombo Radyo Kalibo ni Mrs. Lorivie Bayarcal nga nabugtaw imaw nga bukas eon ro pwertahan it andang baeay ag sa pag-usisa hay naduea ro anang cellphone ag jacket it anang unga.
Dugang pa nga maskin ro andang mga kaeapit-baeay hay ginsueod man it manakaw nga sa andang pagpati hay bukon eamang it sambilog ro responsabli kundi nga may kakuntsaba nga iba pa.
