International News———-Nagpaandam si Pope Francis kay Patriarch Kirill, ro nagatindog nga leader it Russian Orthodox Church, nga indi maging “altar boy” ni Russian President Vladimir Putin.
Ginpahayag ni Pope Francis nga nakipag-istorya imaw kay Patriarch Kirill sa sueod it 40 minuto via Zoom ko nagtaliwan nga Marso 16.
Suno pa sa santo papa, sa unang 20 minuto sigon hay ginsambilog it basa it Russian Patriarch ro tanan nga andang pagpati angot sa gin-umpisahan nga giyera ni Putin sa Ukraine.
Ginpamatian sigon imaw it Santo Papa apang owa imaw it naintidihan sa mga nasambit nga bagay ni Kirill.
Uman man nga nagpaandam si Pope Francis kay Patriarch Kirill sa andang pag-istorya nga bukon sigon sanda it mga kleriko it estado rason nga haeambaeon eamang ni Hesus ro puwedi nanda nga pagagamiton ag bukon ro kataga it pulitika.
Sa pihak nga parte, ginpahayag man kara nga ginakasubo nanda nga ro napili ni Pope Francis ro paggamit it owa nagakaangay nga tono sa paghatod may kaangtanan sa andang naging pag-istorya ni Patriarch Kirill.
Suno sa Orthodox Church, ro nasambit nga mga deklarasyon it santo papa hay owa it bulig nga naitao sa pagbilog it sangka constructive dialouge sa tunga it Simbahang Romano Katoliko ag it Russian Orthodox Church nga importante sigon kapin eon sa makaron nga panyempo.
Samtang, nagkasugot man ro daywang religious leader nga iga-paeabi anay ro andang plano nga magpueong sa Hunyo 14 sa Jerusalem.
