KALIBO, Aklan—Ginmandu it Police Regional Office 6 ukon PRO-6 sa tanan nga mga unit commanders ag hepe it municipal police stations sa bilog nga rehiyon nga hugut nga ipatuman ro Tokhang Kontra Armas Luthang ukon TKAL.
Ro mandu ni Police Brigadier General Jack Wanky hay kasunod it napabalita nga naga-abot sa 30,838 ro loose firearms ukon may expired nga mga lisensiya sa bilog nga Western Visayas ko Marso 2024.
Sa nasambit nga numero, ro probinsiya it Iloilo ro may pinakamataas nga loose firearms nga nag-abot sa 6,427 ag ginsundan it Negros Occidental nga may 6,257.
Ro Aklan hay may una nga 1,873.
Ro TKAL ukon Tokhang Kontra Guinadili-an nga Pusil hay nauna eon nga gin-relaunched ko 2019.
Tuyo kara nga matapna ro pagkalhit it loose firearms ag mga nagakatabu nga krimen gamit ro armas.
Kamana man ro pag-abu it pribadong armadong grupo, motorcycle-riding suspects, gun-for-hire ag iba pang grupo.
Base sa record it PRO-6, naga-abot sa 998 nga loose firearms ag 122 nga explosives ro natigayon nga makumpiska ag 182 nga indibidwal ro naaresto sa unang quarter it 2024.
189 kara hay nakumpiska sa mga ginkasa nga police operations samtang ro 809 hay gin-deposito ukon ginsurender.
Base pa sa record, ro Negros Occidental Police Provincial Office ro may nakumpiska nga maabu nga armas nga nag abot sa 329.
Raya hay ginsundan it Iloilo Police Provincial Office nga may 188, Antique Police Provincial Office nga may 105, Capiz Police Provincial Office nga may 101, Regional Mobile Force Battalion 6 nga may 96, Aklan Police Provincial Office nga may 92, Bacolod City Police Office nga may 41, Iloilo City Police Office nga may 34 ag Guimaras Police Provincial Office nga may una nga 12.
