Kalibo, Aklan-Dismayado ro grupong Bayan Panay sa mga naeansang nga promisa ni Pangueong Ferdinand Marcos Jr. sa sueod it daywang dag-on nga pagpanerbisyo bilang presidente it nasyon.
Suno kay Elmer Forro, halin sa mataas nga presyo it langis, mga nagapangunang baeak-eon hasta sa bugas hay uwa gid it nahimo ro presidente para mapahagan-hagan ro epekto kara sa mga konsumidor ag sa kubos nga pumueoyo.
Kapin pang nalisdan nga makahaw-as sa kapigaduhon ro kubos nga pumueoyo bangud sa masaming pagsirit it presyuhan it produktong petrolyo nga ro ginatumod nga rason hay ro pagsaka man it presyo kara sa pangkalibutanong merkado.
Ginpahayag dugang nga mas naglala ro ginapangatubang nga problema it mga mangunguma bangud sa importasyon bukon eamang it sa bugas kundi maging sa mga tinuean-on ag iba pang produktong agricultural.
Nagakadapat eamang nga takson ag sukton ro presidente sa paaeabuton nana nga State of the Nation Address bangud nga sa mga naeansang ag uwa natuman nga promisa sa anang naging kampanya sa pagkapresidente.
Handom it pumueoyong Pilipino nga makapangabuhi it matawhay, malinong ag bugana.
