KALIBO, Aklan–Pabor ro sangka public health expert sa rekomendasyon it Inter-Agency Task Force for the Management of Emerging Infectious Diseases nga obrahon nga optional ro pagsuksok it face mask sa open spaces ukon sa guwa nga may maayos nga bentilasyon.
Suno kay Dr. Philip Ian Padilla, sangka public health expert halin sa University of the Philippines ukon UP-Visayas nga tiempo eon man agud nga i-adapt it Pilipinas ro ginapatuman nga global practices ag makadungan sa mga kaiping nga mga ASEAN countries pag-abot sa entry processes ag health and safety protocols para maumpisahan ro pagbangon it ekonomiya it nasyon partikular sa turismo.
Ginpahayag dugang nga ro paghaeuga sa health and safety requirements it ibang nasyon hay nagresulta sa positibong epekto sa ekonomiya ag mas madasig nga recovery it mga raya.
Dugang pa nga ro Pilipinas eon lang ro medyu instrikto sa pagsuksok it face mask kumpara sa top 5 ASEAN countries nga ginaeakipan it Singapore, Thailand, Malaysia, Vietnam, ag Indonesia.
Nasayuran nga base sa comparative analysis it mask mandates, owa nakitaan it anuman nga pagtaas sa COVID-19 cases sa nasambit nga mga nasyon maskin nga ginbo-oe eon ro mandatory nga pagsuksok it face mask sa baylo hay mas pa nga nagtaas ro andang tourist arrivals.
Ginpamilit pa ni Dr. Padilla nga matsa hassle man sa mga turista ro pagbiyahe kon maabu pa nga mga requirements ro Pilipinas.
Sa pihak nga parte, nakadepende eon sigon sa tawo kon magasuksok it face mask para sa andang dugang nga proteksyon.
Apang ginapadahan ro mga may immunocompromised, seniors ag bukon it bakunado kontra covid 19 eabi eon nga makihalubilo sa crowded nga mga lugar eabi pa makaron nga tiempo nga flu season.
Kadungan kara, gin engganyo nana ro publiko nga magpabakuna ukon magpa-booster shot kontra covid 19 eabi pa ag maabu pa nga mga variants nga nagatuhaw.
