KALIBO, Aklan — Sangka resolusyon ro gindihon makaron ni Kalibo Sangguniang Bayan member Ronald Marte agud nga mapatuman ro no-helmet policy sa sueod it banwa bangud sa mga nagakatabu nga krimen nga kahimuan it mga motorcycle riding suspect.
Suno kay SB Marte nga engkaso nga mataw-an it katumanan hay mabahoe raya nga bulig sa mga kapulisan sa pagresolba it mga krimen pinaagi sa pagkilaea sa mga suspek.
Gusto it opisyal nga indi eon magsuksok it helmets ro mga motorcycle drivers kaibahan ro angkas sa mga nagapangunang daeanon it barangay poblacion .
Tuyo kara nga indi maitago it mga riding in tandem ro andang identity ukon pagkatawo kon nagahimo it krimen.
Nasayuran man sigon nana nga ro anang ginaduso nga resolusyon hay kabaliktaran sa naga-eksister nga national law nga naga-obliga sa mga motorcycle riders nga magsuksok it helmets sa tanan nga oras kon nagasakay sa andang mga motorsiklo.
Ro resolusyon hay gin-refer sa Committee on Public Safety, Peace and Order, Public Utility, Transportation ag Laws and Ordinances sa pagtalakay kara.
Sa committee hearing hay plano nanda nga imbitahan ro Land Transportation Office (LTO)-Aklan ag Highway Patrol Group kamana man ro Kalibo Municipal Police Station , Transport and Traffic Management Unit (TTMU), Office of the Mayor ag mga riders club sa Aklan.
Nasayuran nga may ibang banwa ag siyudad sa nasyon nga nakapatuman eon it ordinansa angot sa “no helmet policy.”
