SPORTS News — Nabo-oe ni Nesthy Petecio ro ika-ap-at nga medalya it nasyon sa 2024 Paris Olympics matapos mapas-eawan kontra kay Julia Szeremeta it Poland sa women’s 57kg semifinals, aga-aga it Huwebes.
Bangud sa kapiyerdihan, naangkon ni Petecio ro sangka bronze medal nga naging sigurado eon matapos nga makasueod imaw sa semis.
Raya eon ro anang ikaywang Olympic medal kasunod it anang silver medal sa Tokyo tatlong dag-on eon ro nagtaliwan.
Raya man ro ikaywang bronze it Philippine boxing matapos makabo-oe it sambilog si Aira Villegas ko Miyerkules.
Bangud nga nakabo-oe it bronze si Petecio, ginaeauman nga igatau kana ro sangka insentibo base sa nakabaehag sa Republic Act 10699.
Makabaton imaw it P2,000,000 bilang bronze medalist it sangka individual event.
Para sa mga gold medalists sa individual events, ginaeauman nga P10,000,000 ro insentibo samtang ro mga silver medalist hay makabo-oe it P5,000,000.
Ro anang coach mat’a hay makabaton man it insentibo nga katumbas it katunga sa reward ni Petecio.
