MAKATO, Aklan — Patay ro sangka 33 anyos nga rider matapos nga bumunggo ro anang ginamaneho nga motorsiklo sa kasub-eang nga wing van truck sa Diversion Road sa banwa it Makato, bandang alas-11 it gabi-i it Lunes, Disyembre 15.
Nakilaea ro rider nga si Randy Ventura, sangka construction worker nga nagatrabaho sa Isla it Boracay, residente it Mambusao, Capiz apang temporaryong naga-istar sa baeay it anang igmanghud sa banwa it Nabas.
Samtang, ro driver it truck hay nakilaea kay Gerry Barria, 53 anyos, kun sa siin eowas ag owa naka-agum it anuman nga lastro kaibahan ro anang pahinante.
Ginasugid nga ro truck nga may karang mga appliances hay naghalin sa Manila ag nagapa-agto sa andang destinasyon sa Bacolod City.
Samtang ro rider hay halin sa banwa it Banga ag magapa-uli eon kunta sa Nabas, apang pag-abot sa intersection it karsada hay natabu ro aksidente.
Sa kabaskog it impact, inapok ro driver it motorsiklo nga naging rason it anang kamatayon.
Nadaea pa sa ospital ro biktima apang binawian man it kabuhi.
Ginkustodiya ro driver it wing van truck sa Makato Municipal Police Station ag nagpamalibad nga magtau it pahayag sa insidente.
Posibleng magapangatubang imaw sa reklamong reckless imprudence resulting in homicide and damage to property.
Sa pihak nga parte, eubus man ro pagka-kibot it igmanghud it biktima bangud nga nag-ea-ong eamang sigon raya nga magabakae it sigarilyo, apang owa nanda ginaeauman nga nag-deretso imaw sa Banga ag ginasugid nga nagtan-aw it ginpatigayon nga opening of lights.
Sa pinaka-ulihi nga update, nakahilway eon ro driver it truck matapos nga nakaangkon it amicable settlement ro magtimbang nga parte.
