KALIBO, Aklan—Nag-negatibo sa Reverse Transcription Polymerase Chain Reaction (RT-PCR) test ro 20 ka mga indibidwal nga nakaangkon it close contact sa sangka Overseas Filipino Worker (OFW) maghalin sa Libertad, Antique nga positibo sa coronavirus disease (COVID-19).
Ro mga raya hay ginakaeakipan it mga naging kasakay it biktima sa van, ro anang lola ag mga igabata.
Madumduman nga naging kontrobersyal ro nasambitan nga OFW matapos nga mag-atendir sa sangka family gathering sa bahin it Brgy. Linabuan Sur sa banwa it Banga.
Base sa ginpaguwa nga official statement it Municipal Health Office ukon MHO Banga, nga nag-adto sa Linabuan Sur ro nasambitang OFW ko Hulyo 24 agud nga magtambong it family gathering.
May kaangtanan kara, ko nagtaliwan nga Hulyo 27 hay nag-adto imaw sa syudad it Iloilo agud nga magpa-swab test kung sa siin required raya it anang employer.
Samtang, ko nagtaliwan mat-a nga Hulyo 31 hay nagpa-Manila imaw sakay it eroplano agud nga magbalik sa United Arab of Emirates (UAE).
Sa kaparehong petsa ginkumpirma man kana it Antique Provincial Government nga imaw hay nagpositibo sa makataeapon nga sakit.
Samtang ginpahayag ni Dr. Samuel Teodosio it MHO Banga nga sa makarun hay ginbo-oe eun ro lockdown sa andang compound kung siin ginpatigayon ro pagtililipon.
Ginpahayag dugang ni Dr. Teodosio nga gin-isyuhan eun it certificate ro mga nasambitan nga persona kung sa siin pwede eun rayang magguwa sa andang panimaeay matapos mag-negatibo sa makamaeatay nga sakit.
