KALIBO,Aklan — Nauli sa kasubo ro kunta masadya nga recognition ceremony matapos nga ro mismong estudyante nga magabaton it certificate ag medalya hay binawian it hueam nga kinabuhi matapos nga maimbolbar sa aksidente sa national highway nga sakop it Brgy. Cabugao, Batan.
Si Sandy Arboleda, 15-anyos it Brgy. Ipil, Batan hay dead on arrival sa sangka ospital matapos nga sumunggab ro ginamaneho kara nga motorsiklo sa truck sa nasambit nga lugar.
Suno sa anang ina nga si Amalia Arboleda, uwa sanda kasayod nga gumuwa sa highway ro anang onga kon sa siin ginkakibot eon lang nanda ro nakaabot kanda nga impormasyon nga nadisgrasya raya sa national highway.
Bangud kara, sanda eon lang nga ginikanan ro nagsaka sa stage ag ginbaton ro award it andang onga kon sa siin bumuhos ro andang mga eoha matapos nga makit-an ro life size standee si Sandy nga ginpreparar mismo it anang mga mestra sa Ipil Integrated School.
Ginpahayag dugang it ginang nga uwa nana napunggan ro pagtueo it anang eoha bangud sa kasubo nga nabatyagan.
Apang, uwa sigon imaw it ginabasoe para maugan ro paghalin it binatilyo.
Si Sandy hay kamanghuran sa ap-at nga magmanghod.
