KALIBO, Aklan—Arestado ro sangka 53-anyos nga kusinero matapos nga madakpan it baril pasado alas-5:00 kaina it hapon sa Brgy. Bugasungan, Lezo.
Naaresto ro suspek nga nakilaea kay Raban Dela Cruz, residente Brgy. Kinalangay Nuevo, Malinao pinaagi sa gintingub nga pwersa it Aklan Police Provincial Office ag Lezo Municipal Police Station.
Base sa report, narekober sa suspek ro sangka kalibre .22 nga baril kaibahan ro waeo ka mga bala kabaylo it P6,000 nga marked money.
Sa ginpatigayun nga paghaeughog it mga otoridad, narekober dugang sa tool box it ginamanehong tricycle ni Dela Cruz ro sangka kalibre .45 nga baril nga may magazine ag may sueod nga ap-at ka mga bala kamana man ro sambilog pang magazine nga may tatlong ka mga bala.
Maskin nga aminado ro suspek nga ginapanag-iyahan kara ro mga nasambit nga armas, hugut man kara nga ginpamalibaran nga nagabaligya imaw it baril.
Nasayuran nga sangka army reservist man ro suspek.
Ginasugid nga mabuhay eon nga ginasubaybayan it mga kapulisan si Dela Cruz kung siin madinaeag-on man rayang naaresto.
