KALIBO, Aklan — Dismayado ro sangka ama nga hasta sa makaron hay owa gihapon nagahueag ro pamunuan it eskwelahan para magpatigayon it pag-usisa angot sa gina alegar nga pagmolestiya sa anang 12 anyos nga ungang babaye it daywang eaeaki nga anang kaklase.
Suno kay alyas “Jomer”, ama it biktima nga residente it Malinao nga abi nana hay magahueag eagi ro eskwelahan agud nga mag-imbestiga eabi pa ag PTA president sa nasambit nga eskwelahan ro ina it sambilog sa mga ginareklamo, apang owa it natabu.
Base sa panaysayon it anang unga nga haeos tatlong beses eon ro ginhimo nga pag-molestiya kana nga eubus nga naka-apektado sa anang pagkatawo.
Maabu sigon ro ginbag-o sa pagbinatasan it anang unga umpisa nga magsugid raya sa natabu kana.
Ro reklamo sigon it anang unga hay bukon it himo-himo eamang bangud nga may nagakaigo sanda nga medico legal report nga nagapamatuod nga nakaangkon it laceration ro kinatawo it anang unga.
Bangud sa kawad-an it aksyon, ro anang unga mismo sigon ro ginapakamaeain ag gina-bully sa andang eskwelahan nga nagresulta sa kawad-an kara it interes nga magsueod pa sa klase.
Samtang, ro insidente hay ginpa-blotter man sigon nanda sa Malinao Municipal Police Station.
Panawagan it ama nga kabay nga mataw an it hustisya ro natabu sa anang unga.
