Nagapabilin nga missing ro sangka Libacaonon matapos nga ginapatihan nga inanod it baha sa kasagsagan it pag-apaw it tubi maghalin sa Aklan river.
Ginkilaea ni Lennie Zambrona, head it Municipal Disaster Risk Reduction Management Office ukon MDRRMO-Libacao ro missing person nga si Eduardito Turang, 62 anyos ag residente it Brgy. Rivera, Libacao.
Pilang adlaw eon sigon ro ginapatigayon nga search and retrieval operation sa nasambit nga biktima apang hasta sa makaron hay uwa gihapon raya kita-a.
Nasayuran nga sambilog ro banwa it Libacao sa eubus nga naapektuhan it grabeng pagbaha kon siin lima ro nailistang namatay kaeakip ro mag-asawang katimpo nga gin-ulila nanda ro ap-at ka mga onga sa Brgy. Loctuga sa nasambit nga banwa.
Samtang sa pihak nga parte, ginpamalibaran man ni Zambrona ro nagguwa nga balita sa social media nga may dam sa Brgy. Dalagsaan.
Uwa suno kana it kamatuoran ro nasambit nga balita.
Angot kara, ginpadumdom kara ro tanan nga pumueoyo sa Libacao nga maging alerto sa tanan nga oras ag inde eon magpakamatig-a sa oras nga magpatuman it forced evacuation
