Kalibo Aklan ——Ginpakamayad it sangka pamilyang Muslim nga sa baeay eon lang magselebrar it Eid’l Fitr .
Suno ka Brother Ben Manican nga owa eon imaw nag-agto sa andang moske sa banwa it Kalibo bangud sa mabudlay nga transportasyon .
Gindugang pa kara nga ro andang ibang igmanghud nga Muslim sa banwa it Nabas hay sa baybay nagpatigayon it Eid Prayer ag pagkatapos hay nagsaeo-saeo it andang baeon nga pagkaon .
Sarado man sigon ro mosque sa banwa it New Washington sa selebrasyon it Eid’l Fitr ukon ro pagtapos it sagrado nga buean it Ramadan rason nga sa baeay eon lang nagpangadi ro kaabuan kanda.
Raya hay bilang kaparte it pagsunod it mga Muslim sa sueundanan it gobyerno sa pagbawae sa mga mabahoe nga pagtipon-tipon sa moske ukon open space sa makarondaya nga tiempo bangud sa paeag it COVID 19.
Ginpaathag ni Bro.Ben nga ro Eid’l Fitr hay sambilog sa daywang pinakaimportanteng holiday it mga Muslim.
Sa tiempo it Ramadan suno kana hay naga-fasting ro mga debotong Muslim halin sa pagbut-eak it adlaw hasta sa pag-eubog kara bilang pag respeto sa buean kun sa siin ro Quran, ro holy text it mga Muslim, hay na-reveal sa propetang si Mohammed.
Ro Eid’l Fitr hay selebrasyon it katapusan it andang fasting.
Apang bukon it kapareho dati nga masadya ag bonggang selebrasyon hay sa baeay eamang nagpatigayon it Eid prayer ro kaabuan nga mga Muslim.
