Sangka pawikan nga napadpad sa Boracay, una eon sa kustudiya it mga otoridad

KALIBO, Aklan—Una eon sa kustudiya it Philippine Coast Guard ag Bantay Dagat ro sangka pawikan nga napadpad sa isla it Boracay.

Raya hay ginapatihan nga halin pa sa Sabah, Malaysia base man sa tag nga nakakabit sa pawikan.

Una kara, nakit-an sigon it pilang kaeaeakinhan ro nagapanghina eon nga pawikan rason nga insigida nanda raya nga gindakop ag ginsakay sa baroto.

Pag-abot it mga raya sa Caticlan Reclamation area hay insigida nanda nga ginreport sa PCG ro insidente.

Sa pag-usisa sa pawikan, dikara eon nasayuran nga posibleng sa nasyon pa it Malaysia raya naghalin sandig sa impormasyon nga nakakabit kana.