TANGALAN, Aklan — Nagapadayun ro imbestigasyon it kapulisan sa nakit-an nga eaeaki nga duguan ag owa eon it kabuhi sa sueod it sangka nakaparada nga puti nga saeakyan sa kilid it karsadadon nga sakop it Brgy. Jawili, Tangalan, agahon it Huwebes, Mayo 8, 2025.
Suno kay PCapt. Moonyen De Joseph, hepe it Tangalan Municipal Police Station nga ginapatihan nga nagpakamatay pinaagi sa pagbaril sa anang kaugalingon ro biktimang si alyas Boy, 45-anyos, may asawa, trainee employee it Aklan Electric Cooperative (Akelco) nga naka-assign sa disconnection section ag residente it Brgy. Agbago, Ibajay.
Dugang pa ni P/Capt. De Joseph nga nag-request imaw sa SOCO nga ipaidaeum ro biktima sa paraffin test, kamana man nga magpatigayon it ballistic examination sa baril nga narekober, bullet trajectory forensics ag cross-matching examination para sa dugang nga imbestigasyon.
Nag-angkon ro biktima it sangka tama it bala sa ueo halin sa ginapatihan nga kalibre .45 nga baril.
Sa imbestigasyon it kapulisan, nakit-an ro bangkay it biktima sa passenger seat it saeakyan it sangka residente nga naga-jogging sa lugar.
Nakita man nga basag ro windshield sa driver side it saeakyan nga sangka indikasyon sigon nga eumapos ro bala.
Nabo-oe pa sa sueod it saeakyan ro mga bala, resibo it disconnection notices, cellphone nga nakataeanang paga-usisaon kon sin-o ro mga tawo nga ulihi nana naka-istorya ag iba pa.
Samtang, nakataeana pa nanda nga paga-usisaon ro mga CCTV footages nga maeapit sa lugar.
Ginkumpirma nga ro saeakyan nga sangka Rusco pick-up 4×4 type hay ginapanag-iyahan mismo it biktima.
