Kalibo Aklan ——Sa ikaywang kahigayunan, uman nga nagpasa it resolusyon si Sangguniang Bayan Member (SB) Augusto Tolentino agud nga ma-obliga ro Kalibo Sr. Sto. Nino Ati-Atihan Management Council, Inc. (KASSAMACO) officials nga magsumite it andang financial reports sa munisipyo it Kalibo.
Suno kay Tolentino nga nagakabaeaka imaw bangud nga eakot kara ro obligasyon ag pinansiyal nga aspeto it Kassamaco.
Ginpukaw man sigon kara ro atensyon ni Vice Mayor Cynthia Dela Cruz matapos nga owa kunta kara gin-agenda ro anang resolusyon .
Haeos ap-at nga buean eon sigon ro nagtaliwan , apang owa pa sanda nakasumite it financial report.
Sa idaeum suno kana it ginpirmahan nga Memorandum of Agreement (MOA) sa tunga it KASSAMACO President Editha Ureta-Reyes ag LGU Kalibo pinaagi kay Mayor Emerson Lachica , kinahangean nga makapasa sanda it financial report sa publiko ag SB sa sueod it 60 diyas pagkatapos it January 19, 2020 nga selebrasyon .
Tuyo sigon kara nga makaangkon it transparency ag accountability bangud nga kwarta raya it tawo ag masunod ro commission on audit (COA) rules and regulations .
Nagakangawa suno kana imaw bangud nga accountant ag auditor man si Reyes, apang napas-eawan sanda nga makapaguwa it nasambit nga financial statement agud nga masayuran kon pila ro andang kinita sa sang domingo nga Ati-Atihan festival.
Owa man nalikawan ni SB Tolentino nga maikumpara ro KASSAMACO sa dating festival organizer nga KASAFI ni Albert Menez nga insigida naobra ro andang obligasyon.
Indi man sigon nanda pwedeng mapabangdan ro COVID-19 pandemic bangud nga katung-anan eon it marso nagdeklara it lockdown sa Aklan.
Nasayuran nga uman nga ginpatawag ro KASSAMACO officials sa regular session, lunes it hapon agud nga mapaathag ro andang parte.
