KALIBO, Aklan—Temporaryo nga ginsaylo sa frontbeach ro tanan nga klase it water-sea sports activities sa isla it Boracay bangud sa mga mabahoe nga humbak sa bulabog area sa back beach.
Sa abiso nga ginpaguwa it Philippine Coast Guard (PCG)-Aklan nga may petsang Hunyo 1, 2024, halin sa Bolabog area ukon back beach hay ginsaylo anay sa beachfront ro mga aktibidad kapareho it sea sports, island hopping, scuba diving, helmet diving, paraw ag iba pa para sa kaeowasan it mga turista.
Suno kay Coast Guard Lt. Junior Grade John Laurence Banzuela, station commander it PCG-Aklan nga nakipag-angot sanda sa lokal nga gobyerno it Malay ag Boracay Water Sports Association angot sa ginpaguwa nga sea travel advisory.
Sa pihak nga parte, balik eon sa normal ro biyahe it mga motorbanca pasueod ag paguwa sa isla it boracay.
Suno kay Banzuela nga uman nga ginbalik sa Caticlan Jetty Port to Cagban Port ro biyahe it mga raya.
Bangud sa naeksperyensiyahan nga habagat ko nagtaliwan nga mga inadlaw hay ginsaylo ro biyahe sa Tabon Port to Tambisaan Jetty Port bangud sa habagat.
Samtang, dere-deretso eon man suno kana ro regular nga biyahe it mga roro vessel halin sa Caticlan Jetty Port paagto sa Batangas ag Mindoro vice versa.
