Kabilugan nga naging malinong ag matawhay ro selebrasyon it kapaskwahan sa banwa it Kalibo.
Raya hay maskin nga may pila ka mga uwa ginaeauman nga insidente ag aksidente nga nag-eontad sa adlaw mismo it paskwa.
Suno kay PLt. Aubrey Ayon, deputy chief of police for operation it Kalibo municipal police station nga raya ro andang pangkabilugang assessment sa deployment it bilog nga pwersa it Kalibo PNP sa kasagsagan it kapaskwahan.
Partikular eon suno kana nga naging mataway ag maayos ro pagpatigayon it simbang gabi sa mga nagapangunang simbahan sa Kalibo sa sueod it siyam nga gabie.
Madumduman nga antes pa man ro okasyon hay ginpresentar eon it taeatapan ro andang deployment plan para masiguro ro kaeowasan it mga pumueoyo nga nag-atendir it misa de gallo kamana man maassess ro mga raya sa andang concern.
Apang, ginkasubo man it otoridad nga sa mismong adlaw it Paskwa hay ginbawian it hueam nga kinabuhi ro sangka SK kagawad ag siklista kasunod it stabbing incident nga nag-eontad sa Brgy. Tigayon, Kalibo.
Raya suno kana ro insidente nga uwa ginaeauman sa adlaw it kasadyahan.
Inde raya pag-ibutang sa ueo agud nga maangkon gihapon ro madinaeag-on ag masinadyahon nga selebrasyon it bag-ong dag-on.
