NUMANCIA, Aklan—Nagapatigayon it seremonyas sa pagsunog it mga lukay nga benditado ro Aglipayan Church ukon Iglesia Filipina Independiente bilang preparasyon sa ash Wednesday.
Suno kay Fr. Richard Enila, parish priest it Aglipayan Church sa Brgy. Albasan, Numancia nga kada dag-on nanda raya nga ginahimo kun sa siin ro abo halin sa ginsunog nga lukay hay ro andang ginagamit sa Ash Wednesday ukon miyerkules badlis nga gina-krus sa dahi.
Ro Ash Wednesday suno kana ro pag-umpisa it 40 diyas nga pag-umpisa it kuwaresma.
Ro mensahe sigon kara nga ro tawo hay alikabok ag magabalik man sa alikabok.
Kadungan kara, gina engganyo nana ro mga tumueo-o nga magbuylog sa pag-umpisa it Kuwaresma.
Bandang alas-5:00 it hapon it Miyerkules hay magapatigayon anay sanda it misa nga pagasundan it pagbadlis.
Plano man nanda nga mag-agto sa mga eskwelahan agud nga magpatigayon it pag-badlis.
Ginapangamuyo man ni Fr. Enila nga kabay nga dumdumon raya it mga tumueo-o nga puno it kabanalan sa baylo nga maka-mundo nga hilimuon.
Raya man sigon ro tiempo nga pamaeandungan ag hinoesuean ro mga saea nga nahimo.
Ro kuwaresma suno kana hay ro tiempo it pagbiyahe paagto sa pagbag-o ag pagbalik sa sabak it Diyos, pagpabaskog sa pagtuo, pagtau it pageaum ag padayun nga pagpakita it pagpalangga sa isigkatawo.
Padumdum pa nana nga ro eksperyensiya ni Hesus nga nagpakasakit ag namatay sa krus agud nga tubson ro sangkatawuhan hay sangka senyales it dalisay nga paghigugma nga dapat nga ipakalhit.
Sa pihak nga parte, gin anunsyo man si Fr. Enila nga owa pa sanda it ensaktong plano makaron angot sa pagpatigayon it tradisyunal nga sinakulo bangud nga masako ro andang simbahan sa pag-install it andang bag-ong Obispo nga si Rev. Fr. Andy Loma halin sa Diocese of Guimaras nga makaron hay nailihir bilang Bishop-elect it Diocese of Aklan ag Capiz .
