KALIBO, Aklan — Insigidang naaksyunan it pamunuan it Kalibo International Airport ukon KIA ro pag-leak ukon pagtagas it sueod it sangka sewerage line sa prente it terminal building sa domestic area ko nagtaliwan nga Oktubre 3 it agahon.
Suno kay Engr. Eusebio Monserate. Jr., head it Civil Aviation Authority of the Philippines ukon CAAP-Aklan nga owa eon nagbuhay ro pag-alingasaw it mabaho nga hugum bangud nga naghimo eagi sanda it pamaagi agud nga ayuson ro problemang gintuga it nasamad nga linya it septic tank nga medyu may kalumaan eon.
Dekada 80 pa sigon ro mga tubo it septic tank rason nga tumagas ro tubi.
Nagpatigayon suno kana it flushing ro mga tawuhan it Bureau of Fire Protection, nagbutang it disinfectant agud nga malikawan ro pagbaho ag gin-semento ro lugar.
Insigida man sigon nga ginpasueod ro mga nagahueat nga pasahero sa terminal building nga sarado.
Gindugang pa ni Engr. Monserate nga kaibahan ro septic tank sa mga gina-ayos nga pasilidad sa airport.
Samtang, ginklaru ni Engr. Monserate nga matapos nga gin-review ro mga blog sa social media angot sa gina-alegar nga mainit nga kundisyon sa paeuparan hay makabig raya nga luma eon nga kon sa siin ro fooatage hay ko 2018 pa .
Imposible sigon raya nga matabu bangud nga haeos nga naga-doeuble makaron ro air conditioning unit it paeuparan.
Sa kamatuoran suno kana hay nagdugang sanda it masobra sa an-um nga units it standing air conditioning system sa andang terminal building ko nagtaliwan nga domingo.
