KALIBO, Aklan—Ginpasiguro it mga pamatan-on sa banwa it Malay nga magabulig sanda agud nga mabaeabagan ro plano ni pangueong Rodrigo Duterte nga pasugtan ro construction it casino sa isla it Boracay.
Suno kay Kristine Hope Pagsuguiron, Sangguniang Kabataan ukon SK federation president it banwa it Malay nga indi pwedeng maging kabaylo it pagakita-on nga kwarta ro pagkaguba it moralidad it mga pamatan-on ag mga residente bangud sa sugae.
Mag-eowas kara, engkaso nga makaangkon it mabahoe nga construction sa pinaka-popular nga tourist destination, raya hay nagakahueugan it posibleng pagkasamad it kalikasan.
Kabaliskaran sigon raya sa tuyo it ginpatigayon nga rehabilitasyon kon makaangkon it panibag-ong infrastructure project bangud nga over-developed eon ro isla.
Kumpiyansa man imaw nga indi mapursige ro casino kon owa it pag endorso it lokal nga gobyerno.
Apang ibang istorya eon suno kana engkaso nga maduso ro Boracay Island Development Authority ukon BIDA bill sa idaeum it Government Owned and Controlled Corporation ukon GOCC.
Gindugang pa kara nga owa man naga agto ro mga turista sa isla agud nga magsugae kundi agud nga mag enjoy sa beach ag magbakasyon.
Madumduman nga ko 2018 nagpaguwa ro Macau-based Galaxy Entertainment Group ag Filipino partner kara nga AB Leisure Exponent Incorporated it andang planong magpatindog it integrated resort-casino complex sa barangay Manoc-Manoc, nga nagabalor it haeos tunga sa bilyong dolyar.
