Nag-surender sa mga otoridad sa United States ro Smartmatic founder nga si Roger Piñate ag ro dating vice president it election technology provider agud atubangon ro mga kaso kontra kanda.
Suno sa report, nag-surrender sanday Piñate ag dating Smartmatic vice president for hardware development Jorge Miguel Vasquez bangud sa mga kaso nga ginpasaka kontra kanda sa Miami federal court.
Daywa sanda sa ap-at nga gin-indict (indite) it federal grand jury ko nagtaliwan nga domingo bangud sa gina-alegar nga bribery ag money laundering scheme may kaangtanan sa 2016 elections sa Pilipinas.
Ginkasuhan kaibahan nanda sanday dating Commission on Elections (Comelec) chairman Andres Bautista ag Elie Moreno ro former vice president it Smartmatic’s global services unit ag nagserbe man nga general manager it Smartmatic Philippines.
Suno sa Miami Herald, gin-release si Piñate ukon Roger Alejandro Piñate Martinez, matapos raya nga magpyansa it $8.5 million. Samtang ginpahilway man si Vasquez sa pagpyansa kara it $1-million.
Suno sa US Justice Department, ginaalegar nga sanday Piñate ag Vasquez hay nagkuntsabahan agud nga maghimo it indi magnaba sa $1 million nga bribes agud ibayad kay Bautista.
Gina-alegar man nga ginpunduhan nanda ro suhoe pinaagi sa slush fund nga natipon halin sa over-invoicing sa presyo it voting machines nga gin-gamit sa 2016 elections sa Pilipinas.
