KALIBO, Aklan—Natabu eon ro ginakabaeak-an it mga Aklanon.
Raya ro ginpahayag ni Aklan 1st District Sangguniang anlalawigan member Atty. Harry Sucgang matapos nga kumambyo si pangueong Rodrigo Duterte ag ginpasugtan eon ro pagpatindog it casino sa isla it Boracay.
Suno kana nga ko 2018 hay nagtuhaw eon ro nasambit nga isyu matapos nga imandu ro temporaryo nga pagpasarado sa isla agud nga taw-an it daean ro paglimyo ag rehabilitasyon.
Nagapati pa si Atty. Sucgang nga kaparte it plano nga pag-convert sa boracay bilang casino hub ro pagduso it Boracay Island Development Authority ukon BIDA bill nga Government Owned and Controlled Corporation ukon GOCC nga imaw ro magadumaea sa isla.
Ginsuhestiyon para kara ro paghugpong it mga Aklanon agud nga mabawi ro Boracay.
Madumduman nga ko 2018 hay gintaw-an it PAGCOR it provisional license ro Galaxy Entertainment, operation it higanteng casino hotels sa Las Vegas, Macau ag iba pang nasyon.
Business partner kara ro Leisure and Resorts World Corporation para sa pagpatindog it casino-resort nga pagagastusan sigon it $500 milyon dollars.
