KALIBO, Aklan—Ginpahayag it Social Security System (SSS) nga makabaton ro andang mga contributing members nga nawad-an it trabaho it P20,000 pesos nga cash benefits.
Suno kay SSS Aklan head Angelo Blancaver, ro nasambit nga programa it ahensya hay kato pang nagtaliwan nga dag-on nag-umpisa apang mas eabi pang natyempo makaron bangud nga kaeabanan sa andang mga miyembro hay nawad-an it trabaho tuga it Covid-19 pandemic.
Kwalipikado sigon kara ro mga employed nga may 36 months contribution ukon ro mga ginbayaran it andang employer ag uwa it lapse sa ulihi nga 12 months it contribution kon sa siin nawad-an it trabaho bangud sa pagsarado it andang kumpanya ukon establisyimento kaman man ro mga displaced workers nga eubusang naapektuhan it pandemic.
Kinahang-ean sigon nga online ro natungdan nga indibidwal ag ipresenta ro pila ka mga requirements nga ginapangayo nanda para maka-avail sa nasambit nga programa.
Una kara, ginapabutyag nga ro unemployment rate ko buean it Abril hay umabot sa 17.7-percent ukon katumbas it 5-milyong Pilipino nga nawad-an it trabaho.
Eubus nga mataas raya kumpara sa 2.3-milyong datos sa kaparehon buean ko nagtaliwan nga dag-on.
