KALIBO, Aklan—Bangud sa sunod-sunod nga kaso it pagpakamatay sa tunga it COVID-19 pandemic, ginlaygay ni Dr. Jeanette Ortega, sangka psychiatrist sa probinsiya it Aklan nga magdangop sa natungdan nga ahensiya it gobyerno ukon sin-o man nga grupo ukon indibidwal nga pwedeng makatau it laygay ag paggiya sa mga tawo nga nakaexperiensiya it stress, depresyon ag kasubo.
Suno kana nga indi maduea nga makaangkon it makarondaya nga insidente bangud nga umpisa nga magpatuman it lockdown hay maabung negosyo ro napilitang magsarado rason nga indi malikawan nga makaexperiensiya it kasubo ag kahadlok ro mga pumueuyu.
Kaeabanan suno kana nga nagakabaeaka makaron ro publiko angot sa kasiguraduhan sa andang trabaho.
Siin makabo-oe it pang adlaw adlaw nga kinahangeanon.
Siin makabo-oe it bag-ong paeangitan-an ag hin-uno pa matapos ro makarondaya nga sitwasyon.
Gindugang pa ni Dr. Ortega nga kon mabaskog ro buot ag may bastante nga suporta halin sa palibot, maskin paalin hay masarangan nga maeampasan it sangka tawo ro anumang problema apang, kun mahina ag owa nagatau it positibong kaisipan, bukon it imposibleng bumigay.
Kinahangean man sigon ro bulig it pamilya agud nga mapahagan-hagan ag masarangan ro mga pagsubok sa kabuhi.
Sa pihak nga parte, gindugang pa kara nga normal nga makabatyag it kasubo ag pagkabeaka sa makaron nga tiempo rason nga eubus nga kinahangean nga alagaan ro mental health.
Indi pagpasugtan nga maeugmok sa negatibong isip ag eabaw sa tanan, indi mahuya nga magpangayo it bulig kon kinahangeanon.
Kinahangean sigon nga maeampasan naton tanan ro krisis nga ginapangatubang.
Ginpahayag pa nga ro suicide ro nakikitang solusyon it pilang tawo agud nga mapaeagiwan ro ginapangatubang nga problema.
Apang dapat nga isipon nga indi raya makabulig bangud nga makadugang pa raya sa problemang emosyon it pamilya.